Tíðindi

Depositum

Thu, 02 Feb 2012 17:43:00 +0100

200 kr. í depositum fyri útgerð

Tú kanst framhaldandi lána útgerð frá Klippfisk - við einari broyting: Nú skulu øll, sum læna útgerð frá Klippfisk, gjalda 200 kr. í depositum hvørja ferð. Peningurin verður so goldin útaftur, tá ið útgerðin verður latin Klippfisk aftur. Í løtuni er upphæddin 200 kr. Endamálið við skipanini er at tryggja, at Klippfisk fær alla útlænta útgerð innaftur. Um vit meta, at upphæddin ikki er tann rætta, verður hon møguliga broytt seinni.

Les meira um útgerðina her

Klippfisk-skeið í Klaksvík

Tue, 24 Jan 2012 22:11:00 +0100

Klippfisk-skeið í Klaksvík

Eitt intensivt skeið í filmsgerð stendur í hesum døgum næmingum í framhaldsdeildini í Klaksvík í boði. Tað er Klippfisk, sum skipar fyri skeiðnum, ið fer fram hvønn dag hesa vikuna á Skúlanum á Ziskatrøð.

Endamálið

Endamálið við skeiðnum er at geva luttakarunum grundleggjandi lærdóm í filmsgerð, frá tí at søgan skapast inni í høvdinum, til hon kann vísast á løriftinum. Tey luttakandi fáa bæði teoretiska og praktiska undirvísing í filmsgerð, og skulu royna seg við upptøkutóli, við framleiðslufyrireiking, sum klipparar og sum framleiðarar.

Virðisløntur undirvísari

Undirvísarar á Klippfisk-skeiðnum eru Eir í Ólavsstovu og Sakaris Stóra, sum júst hevur fingið virðisløn til ungt listafólk 2011 frá Mentamálaráðnum. Eir og Sakaris hava gjørt nógvar filmir, bæði dokumentar- og spælifilmir, og tey hava eisini drúgvar royndir við undirvísing innan filmsgerð. Zacharias Hammer er kontaktpersónur hjá skúlanum á Ziskatrøð.

Kring landið

Skeiðið í filmsgerð í Klaksvík er triðja skeiðið av hesum slag, sum Klippfisk hevur hildið fyri næmingum í framhaldsdeildini. Hini skeiðini hava verið í Vestmanna og í Tórshavn, og bæði næmingar og lærarar hava verið sera væl nøgd við skeiðini.

Í vár er ætlanin hjá Klippfisk at halda fram við hesum skeiði aðrastaðni í Føroyum.

Klippfisk er ein filmsverkstaður í Havn, sum er fíggjaður av Tórshavnar kommunu. Skeiðini fyri næmingum í framhaldsdeildunum kring landið eru skipað við serligum stuðli frá Mentamálaráðnum.

Upplatingartíðir

Mon, 19 Dec 2011 14:46:00 +0100

Klippfisk hevur stongt frá 23. desember 2011 til 3. januar 2012. Tá verða upplatingartíðirnar hesar:

mána-, týs-, hós- og fríggjadag frá 16 til 19

Væl komin í Klippfisk

Føroyskur stuttfilmur fingið altjóða virðisløn

Fri, 04 Nov 2011 17:39:00 +0100

Føroyski stuttfilmurin Magma hjá Rannvá Káradóttir & Mariannu Mørkøre,
vann í síðstu viku virðisløn fyri besta stuttfilm á viðurkenda
filmsfestivalinum Festival du Nouveau Cinéma í Montreal, Kanada.
Tað vóru íalt 36 altjóða stuttfilmar innstillaðir í hesum kappingarbólkið.

Sjálvt um tað ikki var møguligt hjá teimum báðum Rannvá og Mariannu at
vera til staðar undir handanini, tóku tær ímóti prísinum og takkaðu
fyri heiðurslønina yvir skype, sum síðani varð uppvarpað á stórskýggja
á gallaveitsluni, tá virðislønirnar blivu handaðar.

Komandi sýning av filmunum hjá Rannvá & Mariannu verður á stóra
filmsfestivalinum CPH:DOX í Keypmannahavn, ið verður hildin
3.-12.november. CPH:DOX skipar fyri eini serligari frumsýning av
teimum fyrstu fýra filmunum í The Cycle. Talan er um filmarnar Magma
(2010), Amohr (2011), Marran (2011) og Irra (2011).

Hesi fýra verkini eru innstillað til NEW:VISION AWARD, ið heiðrar
filmisk eksperimentir, ið eru útfordrandi, poetisk og abstrakt.
Vinnarin verður kunngjørdur tann 11. november.

CPH:DOC skrivar soleiðis um filmarnar:

Færøernes barske og storslåede natur danner baggrund for de to unge
kunstneres overjordisk smukke, sort/hvide billeddigt, der toner frem i
gådefulde tableaux som skygger af en anden verden. Den luminøse
himmel, de forrevne klipper og græsklædte vidder er en storslået
scene, hvor sortklædte skikkelser med blege måneansigter udfører et
hemmelighedsfuldt ritual og hvor en lille pige i en kjole danser i en
luminøs tåge af lys.

Der er elementer af både mytologi og science fiction i det færøiske
kunstnerpars visionære værk, der er planlagt som en cyklus i otte
dele, hvoraf Cph:DOX holder 'midtvejspremiere' på de første fire. Med
en fælles baggrund i dans, performance, modestudier, og ikke mindst
fotografi og film, er der ikke overraskende tale om et visuelt begavet
værk, som indskriver sig i og på samme tid fornyer
eksperimentalfilmens store tradition for studier i bevægelse og
kropslighed. Udtrykket er umiskendeligt nordisk, og meget moderne, når
de spøgelsesagtige landskaber svæver over lærredet til et underspillet
ambient/drone-score.

Talan er um tvær sýningar í Keypmannahavn, mikudagin 9.nov. kl.16:00 í
Teater Grob og leygardagin
12. nov, kl. 18:00 í Husets Biograf, har tað eisini verður prátað við
Rannvá og Mariannu um filmarnar
eftir sýningina.

Les meir um filmarnar á www.rammatik.blogspot.com

Casting í Klippfisk

Tue, 18 Oct 2011 19:14:00 +0200

Casting verður fríggjadagin tann 21. oktober í Klippfisk.

Eitt av bjartastu stjørnuskotunum á føroyska filmslistarhimmalinum í løtuni, Heiðrik á Heygum, leitar eftir eini gentu ímillum 19-26 ár at leika høvuðsleiklutin í komandi stuttfilmi hansara.

Ungi filmsstjórin Heiðrik á Heygum, ið m.a. hevur framleitt stuttfilmin Sigarett og portrettfilmin Aldur, sóknast nú eftir einum kvinnuligum leikara ímillum 19-26 ár til næsta stuttfilm sín. Heiðrik gongur á danska filmsskúlanum Super 16, og er tað í hesum høpi, at stuttfilmurin verður gjørdur. Stuttfilmurin verður tikin upp í Keypmannahavn í januar mánaði, og dialogurin verður á føroyskum og donskum.

Um tú ikki ert útbúgvin ella hevur tær stóru royndirnar innan sjónleik, ger tað onki.

Áhugað kunnu skriva til Mariu Winther Olsen (Framleiðslu stjóri) á mariawintherolsen@gmail.com ella ringja á 258447

NOLLYWOOD 2011

Thu, 22 Sep 2011 19:46:00 +0200

NÓLLYWOOD - FILMSSKÚLI FYRI UNG!

Nær: 9. okt - 16. okt 2011
Hvar: Á Háskúlanum í Havn
Hvør: 12 ung í aldrinum 14 til 18 ár
Kostnaður: 2.000 kr. fyri hvønn, íroknað mat, bústað, tilfar, undirvísing - ja, alt!
Tilmelding: Seinasta lagi 25. sep - tú meldar til á klippfisk@klippfisk.fo
Hoyra meira: Ring á 222325

Vit síggjast!

Dokumentarskeið

Fri, 19 Aug 2011 15:30:00 +0200

Pallsetti veruleikin – skeið í dokumentar-filmi

Klippfisk og Globi skipa fyri spennandi vikuskiftisskeiði í dokumentar-filmi á Háskúlanum í Havn í døgunum 19. til 21. august 2011.

Skeiðið byrjar fríggjakvøldið 19. august klokkan 19.30 og endar sunnudagin 21. august klokkan 15.30.

Kostnaður fyri skeiðið er 3.700 kr. fyri hvønn.

Tilmelding er á klippfisk@klippfisk.fo.

Undirvísari verður Henrik Bohn Ipsen, danskur filmsskapari. Hann er nógv umbiðin og hansara dokumentarverk eru fjølbroytt og nógv í tali. Á www.dfi.dk sæst yvirlit yvir nakrar av hansara filmum.

Eisini hava Jan Jørgensen, cand.mag., og Uni Leitisstein Hansen, fjølmiðlafólk, framløgu um dokumentar sum filmsgrein.

Endamálið við skeiðnum er at geva luttakarunum førleikar at finna ta góðu søguna og at fortelja hesa søgu við einum dokumentarfilmi. Skeiðið fevnir um bæði teoretiska og praktiska undirvísing, og bæði roynd og minni roynd fáa nógv burturúr at luttaka.

Undirvísingin fer fram fríggjakvøldið klokkan 19.30 til 23.00, leygardagin klokkan 9.00 til 21.00 og sunnudagin klokkan 9.00 til 15.30.

Skeiðið er ætlað øllum, sum hava áhuga fyri dokumentar-filmi. Bæði tey, ið longu hava førleikar á økinum og sum arbeiða við at gera dokumentar-film og tey minni royndu kunnu luttaka.

Luttakaratalið er avmarkað, og tí ræður um at melda til sum skjótast. Tilmeldingin er bindandi.

Skráin fyri skeiðið verður hendan:

Fríggjakvøldið 19. august kl. 19.30 - Vælkomin. Praktisk viðurskifti. Fyrireikararnir

Fríggjakvøldið 19. august kl. 19.45 – Frásøgn og frásøguhættir í dokumentarfilmum. Dømi verða víst. Jan Jørgensen & Uni L. Hansen

Kaffi og køka

Fríggjakvøldið enda vit klokkan 23.

Leygardagin 20. august klokkan 9.00 til 22 – Henrik Bohn Ipsen lærir frá sær, og vit royna okkum

Sunnudagin 21. august klokkan 9.00 til 15.30 – Henrik Bohn Ipsen lærir frá sær, og vit royna okkum

Lýsing av skeiðnum

Skeiðið er ein samanrenning av undirvísing og royndum. Henrik undirvísir, og luttakararnir fáa høvi at royna seg við at lýsa søgur, og við at fyrireika og gera upptøkur.

Niðanfyri er ein lýsing av, hvørji evni, Henrik Bohn Ipsen viðger:

· Atgongd til dokumentariskt tilfar

· Motivatión – tey, ið eru við í dokumentar-filmi

· Motivatión – leikstjórin

· Dokumentariska rúmið / pallurin

· Myndatólið er til staðar

· At fyriskipa filmanina

· Tað visuella eygnabragdið

· Tann visuella søgan

· Dokumentariskur framferðarháttur

· At fáa greiðu á, hvar søgan er

· Dokumentariskar hendingar – hvussu filma vit tær?

· At arbeiða við persónligum tilfari

· At brúka sítt persónliga tilfar í ein-til-ein myndatøkum

· Praktiskar royndir – hvussu gera vit?

Fleiri upplýsingar fáast við at ringja til Globi á tel. 59 60 62 og til Klippfisk á tel. 22 23 25.

Vegna fyrireikararnar,

Jan Jørgensen og Anton Petersen, Klippfisk, og Kristianna Winther Poulsen, Globi

Nóllywood - SEINASTA FREIST

Mon, 01 Aug 2011 01:00:00 +0200

Filmssummarskúlin byrjar 4. august, men enn eru pláss tøk. SEINASTA FREIST AT TEKNA SEG ER MÁNADAGIN 1. AUGUST!

Nóllywood er ein intens vika, har luttakararnir í bólkum læra at gera film, gera ymsar venjingar, fáa undirvísing - og gera film eftur egnum handritum. Skráin fyri dagarnar er henda:

Dagur 1: Undirvísing og filmuppgávur - chase scena/jagstringarleikmynd

Dagur 2: Undirvísing og filmuppgávur - eitt møti (onkur hittast)

Dagur 3: Framleiðslufyrireiking - leggja síðstu hond á leikrit, vegleiðing í útgerðini

Dagur 4: Upptøkur

Dagur 5: Upptøkur

Dagur 6: Klipping og ljóðarbeiði

Dagur 7: Gera filmarnar lidnar - klipping og eftirviðger

Dagur 8: Almenn sýning og fráferð

Undirvísarar:

Jón McBirnie, Justin Niklas Jones, Anton Petersen, Andrias Høgenni, Jan Berg Jørgensen

Ein meira nágreinilig skrá sæst herDagsskrá fyri Nóllywood 2011

Um Nóllywood:

Nær: 4. til 11. august 2011

Hvar: Í Nólsoy

Hvør: 12 ung í aldrinum 14 til 18 ár

Undirvísarar: Fýra fólk frá Klippfisk og professionell fólk uttanfyri klippfisk

Kostnaður: 2.000 kr. fyri hvønn, íroknað ferðing, mat, bústað, tilfar, undirvísing - ja, alt

Tekna teg við at senda teldupost til klippfisk@klippfisk.fo ella ring 22 23 25 áðrenn mánadagin 1. august kl. 18.00.

Skriva nøkur orð um teg sjálva/n og hví tú vilt við á summarskúlan. Sig okkum eisini, um tú hevur nakrar royndir innan filmsger og hvat tú ert mest áhugað/ur í at arbeiða við (upptøku, leikstjórn, ljóði, klipping, framleiðslu, ljósi)

Vit síggjast í Nólsoy …

Stuðlar av filmssummarskúlanum:

Dansk-Færøsk Kulturfond

Mentamálaráðið

Frá heimavideo til DVD

Tue, 12 Oct 2010 19:00:00 +0200

Liggur tú inni við eini rúgvu av heimafilmum, sum tú hevur hug at klippa og fáa á fløgu?. Nú hevur tú møguleikan at fáa vegleiðing í at spæla bond yvir á teldu og klippa filmin við klippiforritinum Adobe Premier og síðani at fáa tað á DVD. Tað er eisini møguligt at fáa analog bond sum t.d. Hi8 og super8 spæld yvir á teldu. Vegleiðarar eru Franklin Henriksen og Anton Petersen. Fólk í øllum aldri eru vælkomin.

Undirvíst verður kl. 19.00 - 22.10 hesar dagarnar: 12/10, 19/10, 26/10 og 2/11-2010

Tilmelding verður umvgis heimasíðu Kvøldskúlans
www.kvoldskulin.fo

Tilmeldingin byrjar 6. sep. og endar 13. sep.

Klippfisk

Lær at filma A til Z - frá 15 árum

Wed, 06 Oct 2010 17:30:00 +0200

Lær at filma, A til Z við Bjarka Thomsen.

Mikudagar kl. 17.30 - 21.30.
Undirvíst verður 6/10, 13/10, 10/11 og 17/11-2010.

Tilmelding verður umvegis heimasíðu kvøldskúlans.
www.kvoldskúlin.fo

Tilmeldingin byrjar 6. sep. og endar 13. sep.

Klippfisk

Nóllywood - filmssummarskúli í Nólsoy

Tue, 06 Jul 2010 14:30:00 +0200

Filmssummarskúlin byrjar mánadagin 12. juli. Kl. 07:55 fer Ternan av Bursatanga, og vit møtast øll á kaiini (undir Tryggingarfelagnum Føroyar á Kongabrúnni 15 minuttir áðrenn - tvs. kl. 07:40.

Áðrenn vit møtast skulu luttakararnir hava arbeitt nakað við einari undanuppgávu. Luttakararnir hava fingið uppgávuna sendandi við maili (sum viðfestan pdf), men um onkur hevur trupulleikar við at lata upp ella við at síggja myndirnar í pdf-skjalinum, so er tað eisini at síggja her

Nóllywood - dagsskrásæst her - við yvirliti yvir dagar, klokkutíðir og aktivitetir. Eisini sæst, hvat tú skalt hava við tær

Um Nóllywood:

Nær: 12. til 18. juli 2010

Hvar: Í Nólsoy

Hvør: 12 ung í aldrinum 13 til 17 ár

Undirvísarar: Fýra fólk frá Klippfisk og Blanka

Kostnaður: 2.000 kr. fyri hvønn, íroknað ferðing, mat, bústað, tilfar, undirvísing - ja, alt

Vit síggjast í Nólsoy …

Stuðlar av filmssummarskúlanum:

FT Online - høvuðsstuðul

Sendistovan - www.sendistovan.fo

Skeið í special effects.

Sat, 27 Mar 2010 16:54:00 +0100

Vikuskiftið 9.-11. apríl 2010 skipa Meginfelag áhugaleikara
Føroya (MáF) og Havnar Sjónleikarafelag fyri sminkuskeiði í
“special effects”.

Á skeiðnum læra fólk á professionellan hátt at kreera og brúka
make-up til øll sløg av teatri, films- og sjónvarpsarbeiði og at laga
tað til ymiskar fólkastøddir, aldrar og etniska útsjónd.

Vit fara at stoypa andlit og modellera maskur og modell, sum vit
síðan leggja lit á. Vit fara at montera hár, eygu, tenn og aðrar detaljur.
Vit fara eisini at síggja film.

Undirvíst verður kl 19-22 fríggjadagin, 9-18 leygardagin, og 9-16
sunnudagin. Vit fáa ein lættan bita kl. 12 leygardagin og sunnudagin
eisini, og vit fáa kaffi, frukt og annað gott.

Skeiðið er fyri øll áhugað. Maskur og teaturrekvisitt eru interessant
fyri sjónleikara-fólk, men eisini eru special-effects sár og maskur
interessant hjá reyðakross-fólki og teimum, ið fáast við filmsarbeiði.

Lærari er Janus Vinther, sum hevur ein sminkuskúla niðri í
Keypmannahavn, har hann undirvísir bæði lærdum og leikum
og bæði børnum og vaksnum. Janus hevur áður havt skeið fyri
MáF og Havnar Sjónleikarafelag, tað var 7.-9. novembur 2008.

Tilmeldingarfreist: 1. apríl 2010 á 315624 ella maf@maf.fo

Sí heimasíðurnar:

www.maf.fo

www.spfx.dk

Býr ein leikstjóri í tær?

Tue, 26 Jan 2010 18:13:00 +0100

Hevur tú hug at leikstjórna? Ella hevur tú longu leikstjórnað og treingir til íblástur?

Yvirskriftin á skeiðnum er "Tulkingar trupuleikin". Per Zetterfalk setur

fokus og spurnartekin við grundkorini í samskiftinum millum filmmakara og hyggjara.

Skeiðsleiðari er svenski leikstjórin Per Zetterfalk. Zetterfalk hevur skrivað phdritgerð um ta kreativu tilgongdina í filmi, sjónvarpi og sjónleiki. Burturúr ritgerðini kom dokumentarurin um víðagitna dramatikaran og leikstjóran Lars Norén, har Per Zetterfalk granskar í kreativu tilgongdini hjá skaldinum.

Skeiði verður hildið leygardagin 26 mars, frá klokkan 12.00-18.00 í Klippfisk.

Og er ætlað bæði til royndar og óroyndar leikstjórar. Kostnaður er 180 kr incl. mat og drekka.

Áhugaði tekna seg á telduposti: klippfisk@klippfisk.fo

Skeið við Marionnu Mørkøre

Thu, 07 Jan 2010 18:02:00 +0100

Leygardagin 16. januar skipa Klippfisk og MESS fyri einum spennandi degi við Mariannu Mørkøre, ið kallast "Intro til eksperimentellan film".

Skrá:

12.00 - 13.15
Upprunin til eksperimentellan film. Brot úr filmum frá fyrst í seinastu øld úr genrum sum t.d. evropeiskum avantgardistum, dadaistum, surrealistum verða víst.

Kaffi/Te

13.30 - 15.00
Hildið verður á við filmssøguligu menningini við m.a. uppreistrarsinnaðu lettristunum og filmsteoristunum í Sovjetsamveldinum.

Ábit.

15.20 - 16.00
Dansifilmur sum genra. Dømi um modernaðan eksperimentellan film.

Kaffi/Te

16.15 - 18.00
Marianna vísir egnar royndir og framleiðslur. Marianna hevur nógvar royndir innan eksperimentellan film, serliga í samstarv við koreografinum Rannvá Káradóttir. Verkætlanirnar eru nógvar í tali, m.a. Memotekið, Fragmented Unison, Investigation of a Dog. Marianna er undangongukvinna innan hesa genruna ið, sum áður nevnt, liggur uttanfyri tað, vit vanliga síggja.

Skeiðið verður hildið í Klippfisk. Kostnaðurin verður 400 krónur fyri hvønn luttakara incl. kaffi og ábit. Pláss er einans fyri 12 luttakarum.

Tilmelding á klippfisk@klippfisk.fo.

"Karrybollanir" útkomnir á DVD

Fri, 11 Dec 2009 19:16:00 +0100

Karrybollanir

"Karrybollanir" fáast nú til keyps á DVD

Føroyski spælifilmurin "Karrybollanir" fæst nú til keyps á DVD. Tað er Jóhan Rimestad ið hevur leikstjórna og framleitt filmin í samstarv við Klippfisk. Tað er ikki hvønn dag at ein Føroyskur spælifilmur verður útgivin. Og vit á Klippfisk heita á øll um at skunda sær at keypa eitt eintak av "Karrybollunum".

Klaksvíkingar vunnu Umhvørviskapping

Fri, 11 Dec 2009 18:38:00 +0100

Mynd úr filminum "Býrðan"

Filmurin "Byrðan" hjá Jákup Klein, Jóhannes Martin Johannesen og Hermanni Mørkøre vann Norðurlendsku filmkappingina "REClimate" í samband við Altjóða Veðurlagsráðstevnuna í Keypmannahavn.

Yvir hundrað filmar vóru við í kappingini, har av tveir stuttfilmar úr Føroyum

"Tað kennist fyrst og fremst løgið. Samstundis er tað ein heiður at vita, at alt arbeiði, sum vit hava gjørt viðvíkjandi filminum, ikki er til onkis. Nú eru vit eitt sindur kendir í Skandinavia, og møguliga eisini kring allan heim. umleið 200 lond eru umboða á ráðstevnuni. Tað er enntá møguleiki fyri at Obana fer at síggja filmin. Og so er tað eisini tann góði responsurin, man fær frá fólki.

Filmurin "Byrðan" er framleiddure á Miðlabreytini á Tekniska Skúla, Klaksvík.

"Tá vit møttu upp til fyrsta tíman á Miðlabreytini, forkláraði lærarin um eina Skandinaviska filmskapping, sum vit kundu vera við í. Vit vóru beinanvegin við uppá tað. Okkara bólkur riggaði sera væl frá fyrstu stund. Vit fóru í hált við at gera handling og søgu, storyboard og at brainstorma. Komandi daganar gjørdu vit manusskripti.Vit funnu út av at okkum fór at tørva ein stuðul. Vit gjørdu ein PreVis og fóru til EIk. Og so var at fara ígongd. Upptøkunar gingu við rúkandi ferð, og vit kláraðu at filma alla flashback scenuna uppá ein seinnapart. Scenuna úti í Grøv filmaðu vit ein regndag og tað tók uml. 2 tímar. Klipping, redigering og klaver upptøka hevur tikið ómetaliga langa tíð, av tí at vit vildu hava tað perfekt."

"Vit hava hugskot sum vit allarhelst fara at arbeiða við. So vit gevast ikki heilt enn. Serliga nú, tá ið vit arbeiða so mikið væl saman, og hava bæði kontaktir og gott ummæli. So tað er bara at fylgja við, tá ið Sjón production hava okkurt nýtt úti." sigur Sámal Jákup Jakobsen ið er ein av monnunum handan vinnarafilmin.

Marianna og Rannvá fingu heiðursløn

Thu, 19 Nov 2009 16:31:00 +0100

Marianna Mørkøre og Rannvá Káradóttir hava fingið heiðursløn fyri dansi stuttfilmin, Memotekið (enska heitið, Memotech). Vit fingu eina samrøðu við Mariounnu um filmin, og hvussu tað kennist at hava fingið heiðursløn fyri hann.

Hvussu kennist tað at hava fingið heiðursløn á einum altjóða filmfestivali?
Heiðurslønin er ein sera stór viðurkenning fyri meg og Rannvá. Hetta
er við til at skapa fleiri møguleikar fyri Memotekið og sostatt fáa
filmin vístan á enn fleiri festivalum. Umframt hetta hevur tað verið
sera áhugavert at hoyrt, hvat ein altjóða dómsnevd hevur hildið um
filmin. Og so fær man absolut hug at gera fleiri filmar!

Hví hevur tú valt at fáast við júst hetta slagið av filmi? (experimentel film)
Eg haldi, at tað er meiri tann experimentella tilgongdin til film, sum
Rannvá og mær dáma so væl. Man ger sínar egnu reglar fyri, hvussu ein
framleiðsla fer fram. Vit settu nakrar heilt einkultar karmar, har tað
samstundis var lov at hoppa sindur aftur og fram í processuni, og lata
hugflog og spontanitet seta síni merki.

Hvussu er at arbeiða við Super8? og hví hevur tú gjørt av at filma við super8?
Eg havi arbeitt við Super8 áður, og eri vorðin bitin av tí. Rannvá og
eg hildu, at tað kundi verið fanstastiska spennandi at gjørt ein
dansi-stuttfilm við hesum formatinum, sum hevur eitt so vakurt og
estetiskt "look". Hetta hevur eisini givið Memotekið eitt serligt
ævintýrsligt og tíðarleyst look.
Samstundis var Super8 eisini ein avbjóðing fyri koreografiina
eftirsum, at vit fóru at filma í 9,18,24 og 54 frames pr sek. Vit
avprøvaðu nøkur kamera tíðliga í framleiðsluni fyri at fáa innlit í,
hvussu vit kundu arbeiða útfrá ymsu tempounum, og hvussu hetta
ávirkaði koreografiina.
Umframt hetta, so tekur man eina riskio, tá man filmar við gomlum
Super8 kameraum uttan ein digitalan back-up. Vit vistu ongantið
ordiligt, hvat vit høvdu fingið á band, og um tað var gott nokk.Tó
høvdu vit testað kameraini áðrenn upptøkurnar, og vistu, at tey
virkaðu. Filmsrullurnar eru sera dýrar og framkallingin enn dýrari, so
tað er onki við at filma somu senu umaftur 10 ferð. Talan er um hægst
2 ferðir. So ein slík Super8 framleiðsla setur eisini síni
experimentellu merki.

Hvønn týdning hevur samstarvið við Jens L. Thomsen sum komponist havt fyri filmin?
Tað hevur verið sera stuttligt og áhugavert at arbeitt saman við Jens.
Tað hevur havt sera stóran týdning, at hann gjørdi tónleikin. Hansara
ljóð-vocabulary er so enormt stórt og áhugavert. Jens sá tónleikin í
filminum, og hann hevur skapað nakrar ótrúligar stemningar í filminum -
dansurin, landslagið og tónleikurin fór upp í eina hægri eind.

Hvørjar framtíðarætlanir hevur tú við filmslistini?
Man hevur altíð nógv hugskot, men fyrst og fremst kundi eg tonkt mær
at fingi meiri arbeiðsroyndir innan dokumentarfilmsframleiðslu. Eg haldi,
tað hevði verið spennandi at útforska tann bólkin.
Rannvá og eg hava eisini fleiri onnur hugskot, sum vit ætla okkum at
byrja at fyrireika í nærmastu framtíð. Kanska tað verður ein
dansi-langfilmur við Super8 :-)

Á YouTube síðu teirra sæst trailari til filmin

http://www.youtube.com/rammatik

Memotekið hjá Mariannu Mørkøre og Rannvá Káradóttir á London Film Festival.

Tue, 27 Oct 2009 16:15:00 +0100

Føroyski stuttfilmurin Memotekið verður í hesum døgum vístur á The
Times BFI 53rd London Film Festival.

Tað hevur verið nógv at sæð til dansistuttfilmin Memotekið (enska
heitið Memotech) seinastu mánaðirnar. Filmurin hevur verið vístur á
fleiri altjóða festivalum, eitt nú Festival du Nouveau Cinema, Canada
- Formula Mundi, Týsklandi - Détours, Grikkalandi.

Í gjár hevði Memotekið frumsýning í Stórabretlandi á størsta bretska
filmsfestivalinum The Times BFI 53rd London Film Festival, sum er frá
14-29.okt.
Filmurin verður vístur saman við øðrum stuttfilmun undir heitinum
"Landscape as Character". Sýningarnar eru allar longu útseldar. Filmurin
verður framhaldandi við á mongum festivalum, serliga í Stórabretlandi,
so sum Betting on Shorts, Filmstock og NICE.

"Fólk hava verið sera ovfarin av ti vakra landslagnum í Føroyum, og
filmurin hevur sostatt vakt stóran ans á filmsfestivalum kring allan heim",
siga tær báðar Marianna Mørkøre og Rannvá Karadóttir"

Eitt brot av filminum kann síggjast á http://www.youtube.com/rammatik

Meir um London Film Festival á http://www.bfi.org.uk/lff/

Komandi tvær vikurnar verða ikki færri enn trý skeið í video í Klippfisk.

Tue, 01 Sep 2009 16:22:00 +0200

Komandi tvær vikurnar verða ikki færri enn trý skeið í video í Klippfisk.

Nú hósdagin 3. september og fríggjadagin 4. september, frá klokkan 16.00 til klokkan 20.00 verður skeið fyri dreingjum frá 13 árum og uppeftir.

Á skeiðnum verður undirvíst í at gera film. Hvør luttakari fær høvi at gera søgu, tekna myndir, leikstjórna, filma og at klippa. Tá ið skeiðið endar, verða filmarnir vístir.

Franklin Henriksen undirvísir.

Tilmelding á telefon 595175 ella á telduposti klippfisk@klippfisk.fo Upplýsið navn og aldur. Skeiðið er ókeypis.

Týsdagin 8. september og mikudagin 9. september frá klokkan 16.00 til klokkan 20.00 verður gentuskeið - 13 ár og eldri.

Á skeiðnum verður undirvíst í at gera film. Hvør luttakari fær høvi at gera søgu, tekna myndir, leikstjórna, filma og at klippa. Tá ið skeiðið endar, verða filmarnir vístir.

Lea Sørensen undirvísir

Tilmelding á telefon 272804 ella á telduposti klippfisk@klippfisk.fo Upplýsið navn og aldur. Skeiðið er ókeypis.

10. og 11. verður eitt skeið í ljóðeftirarbeiði og ljóðið sum heild. Tað er Haraldur í Kálvalíð ið undirvísir.

Tilmelding er á klippfisk@klippfisk.fo

Skeiðið eru ókeypis.

Tórshavnar Matfestivalur filmaður

Mon, 24 Aug 2009 16:22:00 +0200

Í samband við at fyrsti Tórshavnar Matfestivalur var leygardagin, skipaði Klippfisk, saman við Mortan í Hamrabyrgi og Birgir Kruse frá 100 ára haldinum hjá Tórshavnar Kommunu, fyri at festivalurin varð filmaður. Torfinnur Jákupsson, ið hevur lisið film í Onglandi, hevur tikið sær av uppgávuni, og situr nú og klippur tilfarið. Upptøkurnar verða at síggja á torshavn.fo